हनुमान चालीसा

श्री गुरु चरन सरोज रज, निज मन मुकुर सुधारि ।
बरनौं रघुबर बिमल जसु, जो दायकु फल चारि ॥

बुद्धिहीन तनु जानिके, सुमिरौं पवन कुमार ।
बल बुद्धि विद्या देहु मोहि, हरहु कलेश विकार ॥

जय हनुमान ज्ञान गुन सागर ।
जय कपीस तिहुँ लोक उजागर ॥ 1 ॥

राम दूत अतुलित बल धामा ।
अंजनि पुत्र पवन सुत नामा ॥ 2 ॥

महाबीर बिक्रम बजरंगी ।
कुमति निवार सुमति के संगी ॥ 3 ॥

कंचन बरन बिराज सुबेसा ।
कानन कुंडल कुंचित केसा ॥ 4 ॥

हाथ बज्र और ध्वजा बिराजै ।
काँधे मूँज जनेऊ साजै ॥ 5 ॥

शंकर सुवन केसरी नंदन ।
तेज प्रताप महा जग वंदन ॥ 6 ॥

विद्यावान गुनी अति चातुर ।
राम काज करिबे को आतुर ॥ 7 ॥

प्रभु चरित्र सुनिबे को रसिया ।
राम लखन सीता मन बसिया ॥ 8 ॥

सूक्ष्म रूप धरि सियहिं दिखावा ।
विकट रूप धरि लंक जरावा ॥ 9 ॥

भीम रूप धरि असुर संहारे ।
रामचंद्र के काज संवारे ॥ 10 ॥

लाय संजीवन लखन जियाये ।
श्री रघुवीर हरषि उर लाये ॥ 11 ॥

रघुपति कीन्ही बहुत बड़ाई ।
तुम मम प्रिय भरत सम भाई ॥ 12 ॥

सहस बदन तुम्हरो यश गावैं ।
अस कहि श्रीपति कंठ लगावैं ॥ 13 ॥

सनकादिक ब्रह्मादि मुनीसा ।
नारद सारद सहित अहीसा ॥ 14 ॥

यम कुबेर दिगपाल जहाँ ते ।
कवि कोविद कहि सके कहाँ ते ॥ 15 ॥

तुम उपकार सुग्रीवहिं कीन्हा ।
राम मिलाये राज पद दीन्हा ॥ 16 ॥

तुम्हरो मंत्र विभीषण माना ।
लंकेश्वर भए सब जग जाना ॥ 17 ॥

युग सहस्र योजन पर भानू ।
लिल्यो ताहि मधुर फल जानू ॥ 18 ॥

प्रभु मुद्रिका मेलि मुख माहीं ।
जलधि लाँघि गये अचरज नाहीं ॥ 19 ॥

दुर्गम काज जगत के जेते ।
सुगम अनुग्रह तुम्हरे तेते ॥ 20 ॥

राम दुआरे तुम रखवारे ।
होत न आज्ञा बिनु पैसारे ॥ 21 ॥

सब सुख लहै तुम्हारी सरना ।
तुम रक्षक काहू को डर ना ॥ 22 ॥

आपन तेज सम्हारो आपै ।
तीनों लोक हाँक ते काँपै ॥ 23 ॥

भूत पिसाच निकट नहिं आवै ।
महावीर जब नाम सुनावै ॥ 24 ॥

नासै रोग हरै सब पीरा ।
जपत निरंतर हनुमत बीरा ॥ 25 ॥

संकट ते हनुमान छुड़ावै ।
मन क्रम वचन ध्यान जो लावै ॥ 26 ॥

सब पर राम तपस्वी राजा ।
तिन के काज सकल तुम साजा ॥ 27 ॥

और मनोरथ जो कोई लावै ।
सोइ अमित जीवन फल पावै ॥ 28 ॥

चारों युग परताप तुम्हारा ।
है परसिद्ध जगत उजियारा ॥ 29 ॥

साधु संत के तुम रखवारे ।
असुर निकंदन राम दुलारे ॥ 30 ॥

अष्ट सिद्धि नौ निधि के दाता ।
अस वर दीन जानकी माता ॥ 31 ॥

राम रसायन तुम्हरे पासा ।
सदा रहो रघुपति के दासा ॥ 32 ॥

तुम्हरे भजन राम को पावै ।
जनम जनम के दुख बिसरावै ॥ 33 ॥

अंत काल रघुबर पुर जाई ।
जहाँ जन्म हरि भक्त कहाई ॥ 34 ॥

और देवता चित्त न धरई ।
हनुमत सेइ सर्व सुख करई ॥ 35 ॥

संकट कटै मिटै सब पीरा ।
जो सुमिरै हनुमत बलबीरा ॥ 36 ॥

जय जय जय हनुमान गोसाई ।
कृपा करहु गुरुदेव की नाई ॥ 37 ॥

जो सत बार पाठ कर कोई ।
छूटहि बंदि महा सुख होई ॥ 38 ॥

जो यह पढ़ै हनुमान चालीसा ।
होय सिद्धि साखी गौरीसा ॥ 39 ॥

तुलसीदास सदा हरी चेरा ।
कीजै नाथ हृदय महँ डेरा ॥ 40 ॥

पवनतनय संकट हरन, मंगल मूरति रूप ।
राम लखन सीता सहित, हृदय बसहु सुर भूप ॥